Alltaf gaman að fá koss í vinnunni

Já, ein kona var svo ánægð með aðstoð mína á barnum að hún vippaði sér til mín og kyssti mig á kinnina. Seinna hrósaði fólk mér fyrir varalitinn og ég hélt þau meintu nú bara glossinn minn og brosti vandræðalega og sagði "takk", frekar hissa. Loks kom kona til mín og sagði mér að ég væri með varalit á kinninni, greinilega eftir koss. Þá skildi ég allt. Nú skil ég allt, er eitthvað sem þið skiljið ekki? Hringið í mig. Begga! Mól, ertu ekki að grínast? Hringdu bara í mig, ég skal útskýra þetta fyrir þér. Mamma! "Þéttur melur á kantinum" - kíktu bara í orðabók. Já, það er margt sem þið skiljið ekki en ég skil allt.

Þetta var ágætis árshátíð hjá Flugfélagsgrúppunni þó mér finnist mun þægilegra að vinna á Broadway heldur en í nýju Laugardalshöllinni. Smakkaði kengúrukjöt, ég er ekki sérstaklega hrifin af því en mér finnst gaman að smakka svona lagað. Lára byrjaði að vinna á Broadway í kvöld og stóð sig með stökustu prýði. Lára Lára, minnir mig á að árshátíð MR verður í vikunni! Dásamlegt, ég hef svo góðar spár og háar væntingar... þetta hlýtur að verða dásamlegt kvöld.

Föstudagurinn var yndislegur, einmitt rétta orðið. Begga kom í heimsókn og við horfðum á 2 Pride&Prejudice BBC þætti á DVD, slökuðum á, borðuðum nammi og drukkum appelsín. Síðan fór ég í matarboð til Gunnars Baldvins, hitti viðkunnalegu kærustu hans Elínu, sæta nágranna hans, Arnór og fyndna skiptinemann frá Argentínu, Erlend. Margréttað og mikið vín smakkað. Meira talað og á mörgum tungumálum. Alveg hreint yndislegt kvöld.

Í gær tók ég þátt í prófkjöri í fyrsta sinn, ásamt móður minni, föður mínum og ömmu minni elskulegu. Þetta var ágætt, mömmu finnst þetta mjög merkilegt og stór áfangi! Síðan skruppum við fjölskyldan á Laugarveginn, keyptum okkur geisladiska og töluðum saman. Svona "for a change". Keyptum fullt af skyri, ávöxtum og öðru hollu til að borða. Skemmtileg tilbreyting frá junkfoodinu sem er aldrei í boði hérna heima. Ég fékk líka eitt sérstakasta símtal ævi minnar en nú verð ég að fara að skrifa útdrátt úr Ríki Nátturunnar….

Lengsta atvinnuviðtal sem sögur fara af...

Ég hef allavega ekki lesið um lengra atvinnuviðtal. Ykkur er frjálst að leiðrétta mig.
Fjórar klukkustundir. Fjórar klukkustundir. Ég beið eftir JóaB í fjórar klukkustundir í Hlíðarsmára þar sem hann sótti um vinnu. Aldrei ætla ég aftur með vini mínum í atvinnuviðtal. Þó þetta hafi ekki verið alslæmt. Kjörið tækifæri til að lesa sögu en ég er einmitt að fara í sögupróf. Ég smakkaði mjög gott te, London Fruit and Herbal te. Mæli sérstaklega með ferskjuteinu þó að hindberjate minni mig á Eddu og jarðaberja/vanillute á England. Te er áhugavert. Ég var alin upp í Englandi. Ég drakk þó líka einn og hálfan kaffibolla og magic. Þannig að mér leiddist ekkert.
Í fjóra klukkutíma.
Var reyndar í 20 mínútur í bíl manns sem hafði orðið rafmagnslaus og maðurinn þurfti að hafa hann í gangi. Hann bað mig um að sitja í bílnum og bíða eftir vini mínum ef ég gæti svo enginn myndi stela bílnum. Hann bað mig líka um að stela ekki bílnum. Ég sagði honum að ég hefði sérstaka unun af því að stela bílum og væri þarna að bíða eftir svona tækifæri. Þá bað hann mig um nafnið mitt.
Ég stal ekki bílnum, ég stal magicinu sem ég drakk. Það var miði þar sem starfsmenn krossuðu við hvað þeir drukku úr ísskápnum, mér datt í hug að bæta nafninu mínu á listann og rugla aðeins í þeim. Hætti samt við það. Ef ég sæki um vinnu hjá Hive vil ég ekki að þau muni eftir einhverju svona.
Síðustu daga hef ég spáð með móður minni, frekar mikið. Frekar skemmtilegt. Ég hlakka mikið til helgarinnar en Gunnar Baldvin bauð mér í matarboð. Við verðum 4 saman, Gunnar, Elín (kærastan hans), Arnór og ég. Við höfum öll verið skiptinemar þ.a. ég býst ekki við vandræðalegum þögnum. Hann býður líka uppá rauðvín. Annars má vel vera að við högum okkur eftir því sem stendur í Hávamálum og bæði tölum og drekkum í hófi. Mér finnst það samt ólíklegt.

So the story goes....

Í dag á JóiB afmæli! Hann á afmæli í dag, hann á afmæli í dag! Hann á afmæli hann Jói! Hann á afmæli í dag! Ég vona að þið hafið öll tekið undir með mér og sungið lagið um leið og þið lásuð. Vikan hefur verið frekar leiðinleg, veik, veik, drukknaði í göngu og var veik... helgin varð strax skárri með kuklklúbbi móður minnar og kokkteilum föður míns. Í kvöld kíki ég til Jóa sem á afmæli (eins og hefur áður komið fram). Dominic vinur minn flutti til Hong Kong á fimmtudaginn og þó hann hafi áður búið í Þýskalandi (=líka útlönd) sakna ég hans samt. Vonandi kemst ég út í heimsókn sem allra fyrst. Þó það sé svosem ágætt á Íslandi. Fyrir utan veðrið og veikindi.

Ekki hugsa um sveltandi börn í Afríku

Ég er veik.
Vorkennið mér.

Helgin

Í gær var ég á barnum í þorrablóti og þar sem ég var megnið af kvöldinu ein lærði ég að gera heilan helling af kokkteilum og redda mér.Skemmtilegt kvöld. Misskemmtilegt fólk samt. Ein kona sem sat á borði nálægt barnum sagði sömu 2 setningarnar 3 sinnum í röð. “Þegar ég fer út að skemmta mér, er ég innan við 5 mínútur að mála mig. Ég er ekki að grínast”. Mig langaði að bæta við “þú ert heldur ekki áhugaverð”. Síðan var einstaklega drukkin Sandra Bí að skipa mér að kjósa sig sem forseta. Í augnablikinu vinnur hún í bakaríi, ég veit ekkert meira um hana en munið þetta í næstu forsetakosningum: Kjósið Söndru Bí!

Í fyrradag fór ég á tónleika með Beggu og síðan heim til hennar að slaka á, þangað sóttu Lára og JóiB mig og við rúntuðum og skruppum svo heim til mín að slaka á. Gaman að vera afslappaður einstaklingur.

Í dag ætla ég að læra einstaklega mikið, skreppa í bíó með Gulla og kannski kíkja á kaffihús með Láru sætu, eða jafnvel horfa á Pride and Prejudice með Beggu og Láru. Við sjáum til, við sjáum til!

Skyndibitamenningin

Skemmtilegt umræðuefni, alveg jafn mikil skemmtun og klámvæðing Íslendinga.
Í dag komst ég að því að ég er blönk, þar sem ég fæ ekki útborgað fyrr en um mánaðamót (eins og gengur og gerist) verð ég að hætta að kaupa mér hádegisverð á hverjum degi eins og ég hef gert síðustu 3 daga. Ég legg ekki í vana minn að fara í Kringluna enn ég hef af einhverjum ástæðum borðað á McDonalds, Subway og Dominos - ein skyndibitamáltíð á dag síðustu 3 daga. Allt er þegar þrennt er, nú er ég hætt. Nú á ég engan pening.
Gutti bendir á skilaboðin sem fólk sendir krökkunum sínum með ýmsum setningum og gjörðum í tíma og ótíma og ég er fegin að minn vinahópur er barnslaus. Flestir m.a.s. á lausu, þó ótrúlegt megi virðast. Er kominn tími til að ég setji upp horn piparsveina og piparjónka? Auglýsi vini mína á blogginu mínu fyrir þá sem hafa áhuga. Kannski ég leyfi þeim að elska hvorn annan og redda sér, kannski ekki.
Annars eru slagorð eða auglýsingaherferðir skyndibitastaða mjög skemmtilegar, McDonalds, I´m loving it.... too bad soon I´ll have a heartattack so I can´t love very much longer. Subway - buy really big pants and even you´ll look thin, fatty!, Dominos... ég hef ekkert út á Dominos að setja en mér finnst Papinos (wannabe Dominos "hækkaðu þig um einn") lágkúruleg hugmynd.
Á morgun hefði Mozart orðið 250 ára ef hann sjálfur hefði verið ódauðlegur en ekki eingöngu verkin hans, Begga segir að eitthvað sniðugt sé um að vera á Kjarvalsstöðum í tilefni afmælisins, Frímúrarakór ð syngja never-before-heard lög eftir hann og læti.....

Gettu Betur Keppni Dagsins

Enn og aftur stóðu krakkarnir sig vel og nú munu þeir fara í sjónvarpið! Liðið okkar var ekki bara gáfaðara eða betur undirbúið en Kvennó liðið heldur mun fallegra. Það þótti mér skemmtilegt að sjá, mér finnst líka ótrúlega gaman að horfa á Gutta keppa í þessu, svo öruggur, flinkur og góður! Kann þetta og stendur sig vel.

Veröld nokkurra vina minna snýst um að fatta hver hinn umtalaði Shane er. Hver haldið þið að Shane sé? Ekki einhver úr kúrekamynd frá árinu 1945, vona ég. Annars veti maður aldrei. Hvað veit fólk?

Kíkti í ræktina með Láru áðan og hittum þar JóaB og bróður hans, bróðir hans hló að okkur sem er svosem skiljanlegt. Við flúðum upp, á morgun mun Begga syngja aftur í söngskólanum sínum.

Helgin var dásamleg, chillaði á föstudaginn með vinum og ís og allskonar sósum. Síðan vann ég á laugardaginn á læknaárshátíðinni, þar þekkti ég nokkra gesti sem brostu, knúsuðu mig og dönsuðu jafnvel. Klúðraði reyndar öllu í vinnunni en fékk ekki skammir heldur hrós. Skil ekki alveg hvernig vinnuveitendur mínir hugsa. Skemmtileg vinna samt.

Móðir mín er að læra, ég er víst að tefja hana. Ég læt námsmanni heimilisins eftir tölvuna.

Lítill lækur

Ég er svo stolt af krökkunum í liðinu okkar.
Sérstaklega Gutta.

http://www.fjandinn.com/arthur/archive/2005_09_19_archive.html
Svona minnir mig á Hödda og Sindra.
Hlæ í hvert skipti sem ég les þetta.

Jó gæ

Nú höfum við Lára loksins staðið við stóru orðin og hafið okkar líkamsrækt í GYM80.
Við höldum okkur á efri hluta hússins því niðri eru steraboltarnir með þing.
Við kunnum heldur ekki á lyftingartækin og Lára er sannfærð um að ef við notuðum þau vitlaust eða bæðum um leiðsögn myndi einhver boltanna lemja okkur.
C´est la vie. Talandi á frönsku... þá er frönsk kvikmyndahátíð í Háskólabíói! Mér skilst að það sé helmingsafsláttur fyrir nemendur! Ef einhver vill kíkja má sá hinn sami bjalla í mig (6962898). Ekki skamma mig fyrir að setja númerið mitt á netið, ég er Íslendingur. Það er ekkert mál að finna allar upplýsingar um mig. Meira að segja loftmynd af húsinu mínu eða reitina í kirkjugörðum landsins þar sem ættingjar mínir eru grafnir. Krípí, krípí!
Skemmtilegt veður þessa dagana, nógu slæmt til að foreldrar mínir nenni að keyra mig í skólann. Frábært! Það er líka allt svo fallegt um þessar mundir. Sérstaklega Gutti. Gutti er einmitt að keppa fyrstu Gettu Betur keppni sína á þessu ári í kvöld. MH-Flensborg. 21:30 á Rás2 (þessi keppni). Hlakka til að sjá hvernig nýja, ótrúlega skemmtilega, liðið stendur sig!
Ég er búin að vera þvílík fyrirmyndardóttir í dag og setja í vél, taka úr vél, ganga frá úr uppþvottavélinni, ganga frá þvotti, taka til í herberginu mínu og ég veit ekki hvað og hvað. Foreldrar mínir halda áreiðanlega að ég hafi brotið ómetanlegan bolla eða stolist í ginið þeirra. En svo er ekki. Ég var í tiltektarstuði og þurfti að þvo skólatöskuna mína (vegna saladdressing sem ég bjó til og hélst ekki öll í nestisboxinu). Þannig byrjaði þetta og enginn veit hvar þetta endar. Nú fer ég allavega að þvo mig!

Stóarar ákvarðanir

Af slysni var kveikt á sjónvarpinu þegar þátturinn Party at the Palms byrjaði á Sirkus í dag. Þar sá ég konu í flottustu fötum sem ég hef séð. Hún var líka sú eina klædda í þættinum. Hún var í hlébarðasamfesting, yfir honum skærbleikum sundbol og með neonbelti og hanska. Svona ætla ég að dimittira. Ég er viss um að þið hlakkið öll til að sjá mig.
Helgin var skemmtilegri en þessi þáttur. Matarboð hjá Hilmari og Lóu vakti einhverja nostalgíutilfinningu sem er erfitt að lýsa, eins og þegar ég hitti Einar Sveinbjörns. Kíkti síðan til Jóa þar sem við hittum Hödda og Sindra (myndir á síðunni hans Hödda). Þeir biðu í bílnum eftir okkur í hálftíma án þess að láta okkur vita af sér. Strákarnir eru svolitlir stalkerar af og til en mjög fyndnir og frábærir.
Í dag gerði ég nokkuð sem ég bjóst aldrei við að gera, horfði á Pride&Prejudice með Láru og Beggu. Það var samt nokkuð skemmtilegt enda fíniustu þættir frá BBC og Darcy er í svo fallegum fötum. Síðasta helgi var enn skemmtilegri en þessi enda tvítugsafmælisveisla Össurar þá og það var æðislegt. Var hjá frænda í 10 klst, djammandi, djúsandi og spjallandi við vini hans sem virðast allir sætir, skemmtilegir og fyndnir. Líkur sækir líkan heim?

Sjónvarpið

Ég horfi ekki mikið á sjónvarp, horfi helst á Nátthrafna - næturdagskrá Skjás Eins. Nú hef ég verið í jólafríi svo lengi að mér hefur tekist að slaka á almennilega, lesa góða bók, skrifa kort, taka til allsstaðar, skipuleggja líf mitt fram til þrítugsaldursins og það sem meira er, sitja og horfa á sjónvarpið í tíma og ótíma.


Mér finnst vanta smá tilbreytingu í sjónvarpsdagskrárgerð. Einu sinni gat maður séð feitan mann og grönnu konuna hans saman í fjölskyldugrínþætti en núna virðist vera fólk sem rannsakar morð, kryfur lík og reynir að koma í veg fyrir alvarlega glæpi á öllum rásum, alltaf.

Sem er þó skárra en nýja hugmyndin að raunveruleikaþáttum þar sem farið er heim til fólks og sýnt hve ömurlegt þetta fólk er. Queer Eye for a Straight guy hafði þó style. Wifeswap var hryllingur og mér líst ekki vel á The Nanny. "Sjáið fólk sem kann ekki að ala upp börnin sín, sjáið óþekk börn, það kemur kona sem kennir þeim að ala upp börnin sín. Miðað við þessi börn eru meira að segja ykkar börn vel upp alin! Horfið á ömurlegt fjölskyldulíf", þátturinn "How Clean is your house?" er bara ógeðslegur. Hvaða misskilna athyglissýki brýst út hjá fólki til að það vilji að alheimur sjái að húsið þeirra er viðbjóðslegt? Það gerir sér grein fyrir því, annars myndi það ekki hringja í þáttinn. Smá hint - ef húsið þitt er svo ógeðslegt að þínu eigin mati að þú þarft að hringja í svona þátt.... TAKTU TIL! Ekkert er heilagt, það er líka að fara í gang þáttur þar sem einhver sexpert kennir pörum að stunda kynlíf, án þess að stúlkan "feiki það". Hvernig ætli gaurnum líði þegar kærastan kemur til hans og segist hafa skráð þau í þennan þátt?

En svona er víst afþreyingin nú til dags og þess vegna kýs ég frekar að leggjast upp í rúm með gamla, góða bók.

GLEÐILEGT NÝTT ÁR!

Aldrei hef ég haft jafn góða tilfinningu fyrir neinu ári og árinu 2006. Þetta verður dásamlegt ár, bíðið bara! Ég vona að ég hafi rétt fyrir mér.

Það byrjar a.m.k. vel, var að vinna á nýársnótt og hitti þar með fjölda fólks sem ég þekki og hef ekki hitt langalengi, vorum hressar á barnum, dansandi þangað til allt fylltist.

Síðan fór ég í einskonar nýárspartí hjá Kötlu 1.1.06 sem var mjög fínt, gaman að hitta liðið af gamla borðinu og Jonna, næstu helgi koma LÁRA og Begga heim.

Guð minn góður hvað ég hlakka mikið til að hitta Láru aftur, 18 mánuðir án hennar... ekki alveg málið. Ekki nóg með það heldur eru HÆTTA! tónleikarnir sömu helgi sem og tvítugsafmælisveisla Össurar sem verður vonandi klikkuð!!!

Skólinn byrjar nú áður en helgin kemur en það verður fagnaðarefni, vona ég.

Gleðilegt nýtt ár elsku vinir, ég þakka þau liðnu og bíð með tilhlökkun eftir komandi árum með ykkur!

Gleðileg jól og farsælt komandi ár!

Jólin mín hafa sannarlega verið gleðileg og er það helst góðri fjölskyldu og góðum vinum að þakka. Eins og flest gleði í mínu lífi. Ef ekki öll.
Gjafirnar komu á óvart, voru persónulegar, voru týpískar, voru "not my style" eða dásamlegar. Flestar voru dásamlega persónulegar og skemmtilegar. Ég er ánægð með þær gjafir sem ég gaf og mun gefa (þegar ég sendi gjafirnar til útlanda sem eiga heima þar) og er einnig ótrúlega ánægð með allan mat sem ég hef borðað í þessu jólafríi.
Ég hef hafið hlutastarf sem ég sótti um á Broadway sem þjónn / barþjónn og var fyrsta kvöldið ansi magnað. Annað kvöldið verða áramótin. Það verður að öllum líkindum klikkað. Mér sýnist starfið vera krefjandi, skemmtilegt og spennandi. Við fyrstu sýn. Vona að það búi ekki eitthvað annað bak við tjöldin.
Ég sakna Beggu meir en nokkurs annars og er komin með fráhvarfseinkenni.
Hlakka mjög mikið til að fá Láru sætu heim og tala við Eddu óvenju mikið þessa dagana.
Á Íslandi eru Jóarnir mínir og aðrir vinir til að stytta stundirnar, takk takk takk.

Á morgun verður matarboð sem ég er búin að hlakka til síðan ég heyrði fyrst af því. Dásamlegir gestir, ótrúlega skemmtilegt fólk, rjúpur í matinn og þetta verður frábært. Ég finn það á mér. Ég veit líka að árið 2006 verður brjálæðislega frábært, better than all the rest, again. Hlakka til.

Ég hvet alla vini mína til að fagna áramótunum á Broadway og heilsa upp á mér á barnum. (Engin samtöl, bara "hæ").

Jólafrí

Nú er ég komin í jólafrí og það sem meira er þá er ég komin með leið á því að vera í fríi. Það er líklegast of seint að sækja um störf núna en ég hlakkaði svo til að slappa af. Ekki lengur. Nú langar mig að vinna.
Ég er búin að fá einkunnirnar mínar og ég náði öllu, gekk meira að segja vel.
Alveg sátt! :)

Jólaballið var æðislega skemmtilegt. Þó sumt hafi nú farið í taugarnar á mér og ég spurði óvart stúlku sem vinur minn var að dansa við hvort hún ætlaði heim með honum (hann var EKKI ánægður með mig) þá var kvöldið í heild frekar skemmtilegt og ég er ánægð með það.

Hlakka til að komast niður í bæ að kaupa gjafir og hanga á kaffihúsum, eins og við JóiB ætluðum að gera í dag en nenntum ekki vegna veðurs. Við fórum því í Smáralindina. Ég mæli ekki með því. Ég þoli ekki þessa verslunarmiðstöð.

Bergþóra er á leið til Ástralíu núna, held hún sé í Singapore akkúrat núna, vonandi skemmtir hún sér vel um jólin! Lára, þú hringir í hana! :)

Jólin mega koma

því prófin eru búin búin BÚIN! :)

Einkunnir á mánudaginn en ball í kvöld.

Djammídjammídjamm.

Finally.

Perlujól

heitir leikritið sem ég ætla að sjá ásamt nokkrum vinum mínum á sunnudaginn.
Perlan, leikhópur frá Sólheimum, setur það upp og Jóhann Þorvaldur Bergþórsson semur alla tónlist. Það gerði hann á nokkrum dögum í miðjum prófum og það sem ég hef heyrt er ótrúlega flott. Ég hlakka mjög mikið til að sjá þetta leikrit.
Annars á ég eingöngu 2 próf eftir og þá verður jólaball. Jólajólajólaball.
Síðan mun ég byrja að baka og stússast í einhverju jóladæmi og jafnvel taka til.... svona, fyrir jólin. Bíð samt aðeins með jólalögin, eina viku eða svo.

Próf

Allt verður að taka enda og nú er þessari önn nær lokið.
Prófin byrjuð.
Það er svo gaman að vera í prófum, einungis eitt sem maður þarf að læra og þegar prófinu lýkur þarf maður aldrei að hugsa um það fag aftur, fyrr en á næstu önn.
Sofa, vaka, borða, læra.
Aftur og aftur og aftur.

Annars er ég komin með þraut! Næsti kærasti verður að geta haldið á mér upp stigana hérna heima. 4 hæðir. Ég ætla að leggjast niður og ef hann getur haldið á mér upp má hann eiga mig. Annars ekki. Ég mun segja strákum frá þessu á jólaballinu, ég er viss um að þeir kolfalli fyrir mér.

Síðan vil ég hvetja alla til að gera það að ævistarfi sínu að mótmæla því sem Gutti segir. Og munið, Snorri getur allt - Snorri getur borðað með prjónum!

Ég hefði getað frelsast...

Síðasta gangan. Innanbæjar svo að engar hrikalega afleiðingar yrðu ef krakkar týndust í myrkrinu. Við vorum sex sem týndumst í myrkrinu. Við gengum um í kuldanum og okkur leið ekki vel. Loks komum við að kirkju. Kirkjan stóð þarna sem bjarg. Við sáum ljósið. Við fundum ylinn. Við frelsuðumst ekki. Við lugum að krökkum. Í kirkju. Ætli við förum til Helvítis? Á dómsdegi skal ég sverja að það var óvart. Krakkarnir sögðu okkur að við værum á Íslandi. Þá brá okkur og við sögðum "ha? Erum við á Íslandi? Hvernig komumst við til Noregs?" síðan hélt þetta áfram þar til krakkarnir voru búnir að útskýra mjög vel hvernig við kæmumst til Noregs og við útskýrðum fyrir þeim að íslenska og norska væru mjög svipuð tungumál. Foreldrar sóttu krakkana og rútan frá MH sótti okkur.

Síðasta eðlisfræðiprófið. Ég er svo fegin því að eiga engin eðlisfræðipróf eftir á þessu ári, ein tímaritgerð í stjarneðlisfræðinni, annars ekkert! Þessu verð ég að fagna.

Síðasta setningin. Mamma vill fá tölvuna.

Klukk klukk klukk

Begga klukkaði mig og mér skilst að þá eigi ég að skrifa 5 hluti um sjálfa mig á bloggið mitt. Það ætti ekki að vera erfitt þar sem ég skrifa aldrei um neitt annað en sjálfa mig og hugsanir mínar á bloggið mitt.

* 95% Íslendinga sem ég hitti spyrja mig "Heitirðu Kamma í alvörunni?" og þessi spurning fer mjög mikið í taugarnar á mér þ.a. í sumar svaraði ég þessari spurningu svona: "Nei, í raun heiti ég Kambína og þar sem við þekkjumst ekkert sérstaklega vel finnst mér að þú ættir alltaf að kalla mig Kambínu".

* Þegar ég las setninguna "nú er ég aldeilis hlessa" í fyrsta skipti sýndist mér standa "nú er ég aldeilis hlussa" og hló og hló og hló.

* Ég átti erfitt með að segja veikt g þegar ég kom heim frá Englandi og sagði EINU SINNI "Ái, aujjað mitt" þegar ég fékk bolta í augað - síðan hefur verið gert miiiiiikið grín að mér. Þess vegna finnst mér einstaklega illkvitnislegt að hafa "Dragavegur" sem götunafn.

* Fyrsti kærastinn minn í Englandi, þegar ég var 5 ára, hét (og heitir enn) Danny (Daniel). Fyrsti kærasti minn á Íslandi, þegar ég var 15 ára, hét (og heitir enn)Danni (Daníel)!

* Þegar ég var 4 ára bauð stelpa sem hetir Charlotte mér ekki í afmælið sitt en hún bauð öllum hinum krökkunum í bekknum. Hún sagði mér að foreldrar hennar leyfðu henni eingöngu að bjóða 30 manns (32ja manna bekkur), ég grét og grét og grét. Mamma hefur aldrei getað fyrirgefið þessari stelpu.

Það er búið að klukka alla vini mína sem blogga.

Mannréttindabrot

Hvernig gátu þau skreytt Kringluna í Október?
Það ætti að setja lög um jólaskreytingar verzlana.
Þetta hefur allavega ekki þau áhrif á mig að ég ætli að kaupa meira.
Frekar hitt - ég ætla að forðast Kringluna.